’t Kleed van de Fürstenberg
V’r sjrieve ‘t jaor 1904
En v’r neume de plaatsj Welte
In kesjtieël Terworm kriesjt e klee keend
Ziene örsjte sjrèj over de velder
Z’n moder drigt in ’t kingerbèd
Witte kaant va Brugge en fienge violètte satien
De haore gevlecht en ópgesjtaoëke
Wit e-weg gepoejerde barenswieë
D’r Maximiliaan woos op in ’t Fraans
Gra-pa: örsjte burger an d’r Remersjdèlse gemèngdedeusj
In ‘t kesjtieël van Obsinnich van trapläön roetsjte
En sjtiekem knieng sjete in d’r Baoveste Beusj
D’r jónge baron drigt zjoeër, duuster klejjer
In d’r weenter en lichte wen ’t waerm is
E hat klejjer väör d’r diner, väör de sjoeël
Väör ‘t bezeuk en väör de mis
V’r sjrieve ’t jaor 1943
En v’r neume de plaatsj Mechele
D’r baron drigt e zjwart kleed mit e wit baoërd
En is neet bang öm zich mit de Nazi’s te sjtechele
E hat haelóp geweunsjd dat de geallieerde
D’r kreeg zówwe winne en e waort vasgezat
E jaor hat e in ‘t kasjót gezaeëte
Tussje de muus en soms och ’n vies, broen rat
V’r sjrieve ’t jaor 1946
En v’r neume de plaatsj Roeëme
D’r Maximiliaan sjteet väör de klas
D’r Karol Woytyla lieërt en loestert
Neet väöl later begoes ’t reze
Japan, India, Jordanië, Nuuj Zeeland
D’r Maximiliaan waoërt oetgezonde
In ‘t diplomatiek corps, es apostolisch gezant
V’r sjrieve ’t jaor 1972
En v’r neume de Waelt
Prior van de Malthezer Orde, die hilpt
Bie kraenkde, raampe en kreegsgewaeld
V’r sjrieve ‘t jaor 1988 en v’r neume de plaatsj Namuur
D’r kardinaal wert eges kraank en sjtirft in Mont-Godinne
In ’t hospital. E riek, vool laeëve. Wars va alle chi-chi en plamuur
D’r Maximiliaan waoërt Waeltburger. Waor mieë boete wie binne.
En övver ’t wikkelkleed, d’r wrap-dress
’t Icoon dat ’n feministe drigt
’t Sukses va Diane von Fürstenberg
Va wiet en met ömwaeg, z’n nicht
Zów e oeëts ópmaerkelek sjerp ha gezag
Wie me ‘m vroog wat e van e-zoe get dach
‘ D’r wrap-dress is e symbolisch kleed
’t Innig richtige en respectabel besjeed
Van ’n vrów an ’t kostuum van d’r maan’
En e fluusterende wieër mit ‘ne klinge laach
‘En ‘t kleed dat ‘ch éges draag’
Bep Mergelsberg, augustus 2016