Cataract
't Is duuster óp de Stadshaag.
D'r raeëge vilt mit tóbbe oet de lóch.
't Waelske van d'r Billy Joel sjalt oet de bóxe.
It's nine o'clock on a saturday
De roetewisjere kriege 't water in d'r flótste sjtaand nog neet verwirkd.
In d'r drumsolo van 't geklatter op g'n daak gift 't leech van de kóplaampe twieë sjtriepe gaele daamp.
Esof urgens chemicalië zeunt oontsjnapt.
Ich aom nog ummer zalige Gewitter – lóch. Ruuk ich.
Sing us a song you're the pianoman
Sing us a song tonight
Ich zeen bekaans niks mie deur d'r waterval óp de väörroet.
Une cataracte donne une cataracte. Zingt d'r Jean-François naeve mich. Haargenau óp de melodie.
And you've got us feeling allright
Hie mankere de sjtraotlampe die dich d'r waeg wieze tusje de depe koele.
De Stadshaag is d'r kórtste waeëg tussje Muringe en Fouras.
'ne Vaeldwaeëg langs 'n depe, bebusjde grub an de rechterziej en 'ne hoeëge graaf an de leenkerziej.
En e geet fórsj bergaaf. V'r zeunt de grens al gepasseerd.
But there's someplace that he'd rather be
Ich vaar d'r Jean-François nao heem, nao Fouras.
Maar eerst nog een Duvel in de Red Bull.
Dat makde d'r Felix oet. Miene hollendsje naef oet De Zjwarte Kat va Amstelveen.
De Suzanna, zieng vlam van de lètste daag, geet mit 'm óp de achterbaank.
Bill, I believe this is killing me
D'r Felix studeert Rechte an de universiteet.
In Mastrich zów me ooch van de drugs aafkaome.
Taant Ursula en noonk Bèr moesse 'ns wete wat zich hie aafsjpelt. In de maïsvelder en de boeresjure.
En wat 't versjil is tusje 'ne joint en 'ne Duvel? Haat mich ooch nog nieëmes kinne oetlègke.
In eker gevaal zit d'r Felix noe grellig an d'r Duvel en an de gekrólde Suzanna.
And the waitress is practicing politics
De Suzanna zit in 't zelfde jaor wie d'r Felix. 't Is va Düsseldörp.
Ze list Die Pest van Camus in d'r muziekclip van Die Toten Hosen.
Wannsee, Wannsee, Wannsee Ich dich endlich wieder.
And the busnissman slowly get stoned
D'r Jean-François sjtóng 'n oor lae high an de hoesdaor. E koom van Mastrich aaf.
E lieërt dao väör tolk Nederlands-Fraans en dat geet 'm aaf wie niks.
Is ooch neet raar. E kalt allebèj de tale al daag.
En de Hollendsje bus geet mer tut Muringe.
They are charing a drink they call loneliness
D'r Felix en de Suzanna roebele óp de achterbaank.
Aa-aa-aa ie-ie-ie oh-oh-oh. Oh-oh-ooooh.
Gekuum en gekriej in 'ne Fiat.
But it is better than drinking alone
Inins begint d'r gaanse wagel te roebele. Esof v'r uvver grivvel vare. Wae broejt hie noe bouwafval!
D'r Jean-François duujt de ziejroet aoëpe.
Ich huur vanaal knappe oonder de autobeng. Platsj - ploetsj – pratsj –platsj – ploetsj – pratsj.
Ich zeen väör en naeve mich vanaal omhoeëg flatsje.
D'r Jean-François deed ziene kóp oet 't veensterlaoëk en trèkt 'm direc wer truuk.
E sjrieuwt dat e maoj in 't gezich haat kraege en driejt zich nao mich um.
De la boue. De la boue. Encore un peu de boue.
Sing us a song you're the pianoman
Ich duuj op de frenge.
Zeen 'n nog laevende, gekwitsjte króddel in zie gezich hange.
De puutsjes bewaege nog óp zieng wang. Zjuus oonder z'n leenkerów.
Ze bewaege nog, ze bewaege nog.
D'r boek is plat en kapot. De derm hange d'r oet.
D'r zjweet brikt mich oet. Miene maag driejt zich um.
Ich preuf va wiet de noon.
We're all in the mood for a melody
Mit 'ne breul broejt d'r Felix de string van de Suzanna in zie gezich.
De Suzanna ziet de kapótte króddel en sjrieuwt de waelt biejee.
Eine zerquetschte Kröte! Shit – Scheisse – Fu-u-u-uck.
Mit 'n hand wrieft d'r Jean-François de string en de króddel van zie gezich aaf.
Broejt aal nao boete.
Des crapauds! Króddele!
V'r vare de króddele kapót die hie op Brook mit doezende truuk nao de wieëre geunt.
It's a pretty good crowd for a Saturday
V'r zeente luuj in 't giftig leech van de laampe.
Mèt de parapluus óp en ene mit 'ne fiets.
Ing vrów met häör hundsje óp d'r aerm.
Ze kalle empört en kieke.
Ze zeunt wie an d'r groond genaegeld.
Verbauwereerd. Stupéfait. Entsetzt.
Ze kieke en zeente de ravage.
Ze kinne niks mie.
Vaer kinne niks mie.
To forget about live for a while
Ich zit d'r motor aaf en sjtap oet. De muziek sjpelt wieër.
And the piano it sounds like a carnival
Ich zeen 'n dieke, duuster, dèkke van doezende króddele euver de waeg waggele.
Ich loop óp m'n tieëne tusje de kadavere deur en kiek achter d'r óttó en zeen 't masacre.
E sjlaagvaeld va vermorzeling han 'ch achter mich naogelaote.
Ich mót kótste mae 't keumt niks.
And the microphone smells like a beer
Ich loop nao de luuj en aanhuur mich sjeuldbewus hun kakafonie van verwiete.
Hebde ge da bord nie gezien boven op den berg?
Cette rue est interdit pour des voitures cette semaine.
Wat heb je aangericht! Stomme gans!
Sjmaerlap! Doe kins noe neet maordend wieër vare. Doe has al hoonderde doej dere op die gewete!
Man what are you doing here
Va wiet huur 'ch de sirene van de gendarme aa-zjwelle.
D'r Jean-François sjtapt oet.
Prend mon vélo! Sors d'ici! Zaet d'r maan mit d'r fiets.
D'r Jean-Francois weenkt nog en viert e-weg.
De Suzanna en d'r Felix vreutele zich oet d'r óttó.
Ze renne haand in haand nao de bebusjde grub.
En voet zeunt ze.
Sing us a song you're the pianoman
Ich loop truuk nao 't kóffer van miene greune Fiat.
Sjtaamp oonderwaeg de knalgael string van de blón Suzanna in de gut.
Doon 't kóffer óp en pak miene ege roeje knirps d'r oet en doon 'm óp.
Dan beginne de traone te lope.
Van alling.
Tout seul.
Sing us a song tonight
Plus rien à faire.
Niks mie te make.
Well we're all in the mood for a melody
Ich han hoonderde króddele kapót gevare.
And you've got us feeling allright
Piano en moondharmonica sjpaele d'r epiloog.
Deur de nog wiet aoëpesjtaonde óttódäöre.
De melodie verluust zich in de duuster, natte vaelder en bèjt, zjuus wie ich, in traone verlaore óp wat kaome geet.
© Bep Mergelsberg
januari 2021
(winnaar Pronk! 18 april 2021, schrijfwedstrijd voor schrijvers uit Nederlands en Belgisch Limburg. Jury: Koen Sels, Maartje Smits en Octavie Wolters)